رباعيات .. صلاح جاهين ..

فى ذكرى الفنان الاكثر من رائع بكلماته وتصوراته ((صلاح جاهين )) .... مقتبسات من رباعياته ((اللى بينا))

دخل الربيع يضحك لقانى حزين ..نده الربيع على اسمى .لما قلت : مين؟؟
حط الربيع أزهاره جنبى وراح ..وأيش تعمل الازهار للميتين ؟؟
وعجبى

انا شاب لكن عمرى ولا الف عام .. وحيد وبين ضلوعى زحام
خايف ولكن خوفى منى انا ..اخرس ولكن قلبى مليان كلام
وعجبى

يا باب مقفول .....امتى الدخول ؟؟ صبرت ياما واللى يصبر ينول
دقيت سنين .....والرد يرجع لى :: مين؟؟؟
لو كنت عارف مين انا ...كنت اقول
وعجبى

أحب أعيش ولو فى الغابات ..اصحى كما ولدتنى امى ...وابات ..طائر
حيوان .. حشره .. بشر ...بس أعيش ..
محلا الحياه ...حتى فى هيئه نبات
وعجبى

سهير ليالى وياما لفيت ..وطفت ف ليله ..راجع فى الضلام ..قمت شفت
الخــــــــــوف .. كأنه كلب سد الطريق وكنت عايز اقتله ...بس خفت
وعجبى

كان فيه زمان سحليه ..طول فرسخين ..كهفين عيونها .. وخشمها بربخين
ماتت لكن الرعب ..لم عمره مات ..مع انه فات بدل التاريخ ..تاريخين
وعجبى

عجبتنى كلمه من كلام الورق ..النور شرق من بين حروفها وبرق
حبيت اشيلها فى قلبى ..قالت حرام ده انا كل قلب دخلت فيه اتحرق
وعجبى

خرج ابن ادم من العدم قلت :رجع ابن ادم للعدم قلت :
ياه تراب بيحيا ...وحى بيصير تراب ..الاصل الموت ولا الحياه ؟؟؟
وعجبى

ضريح رخام فيه السعد اندفن وحضره فيها الشريد من غير كفن
مريت عليهم ....قلت ياللعجب الاثنين ريحتهم لها نفس العفن
وعجبى

ياما صدفت صحاب وما صحبتش..وكاسات خمور وشراب وماشربتش
اندم على الفرص اللى انا سبتهم ولا على الفرص اللى ما سبتهمش
وعجبى

والكون ده كيف موجود من غير حدود وفيه عقارب ليه وتعابين ودود
عالم مجرب فات وقال سلامات ..ده ياما فيه سؤالات من غير ردود
وعجبى